नवलपुर
नवलपुरको कावासोती नगरपालिका–१० मगरकोटको जनता माविमा राजनीतिक खिचातानीले लामो समयदेखि विद्यालय व्यस्थापन समितिले पूर्णता पाउन सकेको छैन ।
विद्यालयको भौतिक अवस्था राम्रो रहेको र भौगलिक हिसाबले सबैलाई पायक पर्ने भएपनि राजनीतिले विद्यालयको शैक्षिक अवस्था खस्किएको स्थानीयले गुनासो गरेका छन् । समितिले पूर्णता नपाउँदा भर्ना अभियानमै समस्या भएको प्रधानध्यापक मनोजकुमार श्रेष्ठले बताए ।
तत्कालीन अध्यक्ष नारायण तिमिल्सिनाको कार्यकाल सकिएपछि गत फागुन २५ गतेको भेलाले विद्यालय व्यस्थापन समिति गठनका लागि प्रत्यक्ष तर्फबाट ४ जना सदस्य चयन भएका छन् । अध्यक्षमा आकांक्षीहरु बढी भएपछि २ जना मनोनीत गर्ने सदस्य मनोनयनमा समस्या भएको छ । स्रोतका अनुसार अध्यक्षका लागि नेकपा एमालेबाट निवर्तमान अध्यक्ष नारायण तिमिल्सिना, सीता पंगेनी र नेपाली कांग्रेसबाट कृष्ण अधिकारी आकांक्षी छन् ।
निर्वतमान अध्यक्ष तिमिल्सिना पुन दोहोरिन चाहेका छन् भने नेकपा एमालेबाटै पगेंनी समेत अकांक्षी भएपछि समितिलाई पूर्णता दिन सकस भएको हो ।
प्रकाशित मिति २०८० जेठ ८ गते सोमबार ०३:३५
