पोखरा
‘कास्कीमा लागु औषधको विगत, वर्तमान र भविष्य’ विषयक अन्तरक्रिया भएको छ ।
बुधबार वडा प्रहरी कार्यालय बैदाममा अन्तरक्रिया कार्यक्रम भएको हो ।
पोखरा महानगरपालिका वडा नम्बर ६ सँग जिल्ला प्रहरी कार्यालय कास्की र वडा प्रहरी कार्यालय बैदामले सहकार्य गर्दै कार्यक्रम गरेका हुन् ।
अन्तरक्रियामा बोल्दै जिल्ला प्रहरी कार्यालय कास्कीका सूचना अधिकारी डिएसपी श्रवणकुमार विकले कास्की लागुऔषधका दृष्टिले जोखिममा रहेको बताए ।
उनका अनुसार चालु आर्थिक वर्षमा मात्रै ७७ मुद्वा लागुऔषध सम्बन्धका दर्ता भएका छन् ।
‘तथ्याङ्कभन्दा पनि बाहिर लागुऔषधका समस्या छन्’, उनले भने ।
लागुऔषधको प्रयोगलाई न्युनिकरण गर्न जिल्ला प्रहरी कार्यालय कास्की जिम्मेवारपूर्वक लागेको डिएसपी विकको भनाइ छ ।
पोखरा महानगरपालिका–६ का वडाध्यक्ष विष्णुबहादुर भट्टराईले लेकसाइड क्षेत्रमा विदेशी पाहुनाको चहलपहल हुने भएकाले लागुऔषधको जेखिम बढी रहेको बताए ।
समाजमा हिंसा बढाउने भएकाले सचेतना फैलाउन स्थानीय सरकारले भुमिका खेल्ने उनको भनाइ छ ।
अन्तरक्रियामा लागु औषध न्युनिकरणमा सरोकार राख्ने संघसंस्थाका प्रतिनिधिकोसमेत सहभागिता रहेको थियो ।
प्रकाशित मिति २०८० माघ २५ गते बिहीबार ०१:०५
