पोखरा ।

कास्कीको अन्नपूर्ण गाउँपालिका वडा नं ९ तिखेढुंगास्थित भुरुङ्दी खोलामा एक महिलाको शव फेला परेको छ ।  शव स्पेनिस नागरिक मोलास जुन्काको हुनसक्ने प्रहरीकाे प्रारम्भिक अनुमान छ ।

शव बिग्रिएर पहिचान गर्न कठिन हुने अवस्थामा भेटिएकाे प्रहरीले जनाएकाे छ । शवकाे पोष्टमार्टमका लागि पोखरा ल्याइएको छ ।

सोमबार साँझ माछा मार्न गएकाहरुले शव देखेपछि प्रहरीलाई खबर गरेकाे अन्नपूर्ण-९ का वडाध्यक्ष रमेश गुरूङले बताए । खबरपछि नेपाल प्रहरी र सशस्त्र प्रहरीको टोलीले मंगलबार शवकाे उद्धार गरि पोखरा ल्याएका हुन् ।

जुन्का गत भदौ १० गते हराएकी थिइन् । खोलाछेउ उनीहरूको झोला, लठ्ठी र कपडा भेटिएको थियो । उनीसँगै हराएका इरिक कासानोभासको शव यसअघि नै फेला परेको थियो ।

उनीहरू दुबै जनाले घोरेपानी पुनहिल पदयात्रा जाने भन्दै अन्नपूर्ण संरक्षण क्षेत्र आयोजना (एक्याप) को बिरेठाँटी चेकपोष्टमा भदौ ९ गते इन्ट्री गरेका थिए ।