पोखरामा कोरोना संक्रमणका कारण मृत्यु हुनेको संख्या आज पनि थपियो

कोरोना भाइरस (कोभिड–१९)संक्रमणबाट कास्कीको पोखरामा उपचारका क्रममा मृत्यु हुनेको संख्या आज पनि थपिएको छ । कास्कीमा उपचाररत दुई जना संक्रमितको मृत्युु भएपछि उक्त संख्यामा थप भएको हो ।

पोखरा महानगरपालिका–६ की ८२ वर्षीया महिला र स्याङ्जाको अर्जुनचौपारी गाउँपालिका–५ का ६२ वर्षीय पुरुषको बिहीबार राति उपचारका क्रममा मृत्यु भएको गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोद विन्दु शर्माले जानकारी दिएका छन् ।

प्रबक्ता शर्माका अनुसार ८२ वर्षीया महिलाको पोखरास्थित चरक मेमोरियल अस्पतालमा बिहीबार राति मृत्यु भएको थियो उनीमा वैशाख १५ गते कोरोना संक्रमण पुष्टि भएको थियो ।

यसैगरी स्याङ्जाका ६२ वर्षीय पुरुषको पोखरास्थित मणिपाल शिक्षण अस्पतालमा बिहीबार राति १२ः४५ बजे मृत्यु भएको उनले बताए । उनीमा वैशाख ५ गते संक्रमण पुष्टि भएको थियो ।

थप दुई जना संक्रमितहरुको मृत्युपछि गण्डकी प्रदेशमा कोरोना संक्रमणबाट मृत्यु हुनेको संख्या २२३ पुगेको छ ।