लमजुङमा ट्याक्टर दुर्घटना, चालकको मृत्यु

लमजुङ ।

लमजुङको बेसीशहर नगरपालिका–१ रिठेबगरमा आज बिहान ट्याक्टर दुर्घटनामा परि एक जनाको मृत्यु भएको छ।

जिल्ला प्रहरी कार्यालय लमजुङका अनुसार बिहान करिब ५ बजे उदिपुरबाट रिठेबगरतर्फ जाँदै गरेको प्रदेश नम्बर ०२०३–००१ त.५४३० नम्बरको खाली ट्याक्टर अनियन्त्रित भई करिब ५० मिटर तल खसेको हो।

दुर्घटनामा परी ट्याक्टर चालक बेसीशहर नगरपालिका–१ उदिपुर ढाडगाउँ निवासी ३१ वर्षीय अहिर परियारको घटनास्थलमै मृत्यु भएको जिल्ला प्रहरी कार्यालय लमजुङका डिएसपी रेशम बोहराले जानकारी दिए ।

प्रहरीका अनुसार मृतकको शव पोष्टमार्टमका लागि प्रदेश अस्पताल, बेसीशहर लमजुङ पठाइएको छ।

दुर्घटनाका सम्बन्धमा थप अनुसन्धान भइरहेको जिल्ला प्रहरी कार्यालय लमजुङका सूचना अधिकारी प्रहरी निरीक्षक राजकिशोर शाह तेलीले जानकारी दिएका छन्।