पोखरा ।
अमेरिकाको गृह सुरक्षा मन्त्रालयले नेपालीलाई दिंदै आएको अस्थायी बसोबास सम्बन्धी अनुमति टेम्पोररी प्रोटेक्टेड स्टाटस (टीपीएस) समाप्त गर्ने घोषणा गरेको छ ।
अमेरिकाको गृह सुरक्षा मन्त्रालयले सूचना निकालेर नेपालको अवस्थाको समीक्षा र सम्बन्धित साझेदार निकायहरूसँगको परामर्शपछि नेपालीले टीपीएसका लागि वैधानिक आवश्यकताहरू पूरा नगर्ने निष्कर्ष निकालेको जनाएको छ ।
मन्त्रालयले टीपीएस हैसियतमा अमेरिकामा बस्दै आएका नेपालीहरूको अरू हैसियतमा बस्ने वैधानिक आधार छैन भने अब स्वदेश फर्किने तयारी गर्न पनि भनेको छ ।
यो निर्णयले हजारौँ नेपालीहरूलाई असर गर्ने बताइएको छ । उनीहरूलाई नेपाल फर्कन दुई महिनाको समय दिइएको छ ।
यस हप्ता प्रकाशित एक संघीय राजपत्र सूचनामा नेपालका लागि टीपीएस आधिकारिक रूपमा सन् २०२५ अगस्ट ५ तारिखको मध्यरातबाट अन्त्य हुने छ ।
चार वर्षअघि सन् २०२१ को अन्त्यसम्ममा १४ हजार पाँच सय ५६ नेपाली अमेरिकामा टीपीएस कार्यक्रमअन्तर्गत बसिरहेका थिए ।
९ महिनाअघि सार्वजनिक भएको अर्को तथ्यांकमा भने विश्वका १६ देशबाट आठ लाख ६३ हजार रहेकामा नेपालका सात हजार आठ सय ७५ जना अमेरिकामा टीपीएस कार्यक्रमअन्तर्गत बसिरहेको उल्लेख छ ।
सन् २०१५ मा राष्ट्रपति बाराक ओबामाको प्रशासनले नेपालीलाई टीपीएसको हैसियत प्रदान गरेको थियो ।
टीपीएस सशस्त्र द्वन्द्व, वातवरणीय प्रलय लगायतका असाधारण संकटमा रहेका देशका आप्रवासीलाई अमेरिकामा बस्ने र काम गर्ने अनुमति दिने कार्यक्रम हो ।
यसअन्तर्गत नेपाल, एल साल्भाडोर, निकारागुआ र होन्डुरसका ती लाख ३७ हजार आप्रवासी अमेरिकामा बसोबास गरिरहेका छन् । अब उनीहरुले अमेरिकामा वैध रूपमा बस्ने अधिकार गुमाएका छन् ।
प्रकाशित मिति २०८२ जेठ २४ गते शुक्रबार ०९:१९
