गोरखामा माइक्रोबस दुर्घटना, ९ जना घाइते

गोरखा

पूर्वी नवलपरासीबाट गोरखा घुम्न आएका यात्रु सवार माइक्रोबस गोरखा नगरपालिका–११ स्थित पन्ध्रकिलोमा दुर्घटना हुँदा ९ जना यात्रु घाइते भएका छन्।

गोरखा–आँबुखैरेनी सडकखण्डमा आइतबार दिउँसो १२ः२० बजे ध १ ख ४६२ नम्बरको माइक्रोबस अनियन्त्रित भई सडकछेउको नालामा पल्टिएको प्रहरीले जनाएको छ।

सदरमुकामबाट फर्कने क्रममा भएको उक्त दुर्घटनामा बसमा सवार १६ जनामध्ये ९ जना घाइते भएका छन्। घाइते सबैलाई प्रदेश अस्पताल गोरखामा उपचार गरिँदैछ भने बाँकी ७ जना यात्रु सकुशल छन्।

घाइतेहरूको अवस्था मध्यम रहेको र उनीहरू नवलपरासी जिल्लाको देवचुली नगरपालिकासहित विभिन्न स्थानका बासिन्दा रहेको जनाइएको छ।

घटनाबारे थप अनुसन्धान भइरहेको र माइक्रोबस दुर्घटनाको कारण खुल्न बाँकी रहेको गोरखा जिल्ला प्रहरी कार्यालयका सूचना अधिकारी प्रहरी नायब उपरीक्षक इन्द्र प्रसाद सुवेदीले जानकारी दिए।