जम्मू-कश्मीरमा भयाे ‘क्लाउड ब्रस्ट’, १२ जनाको मृत्यु

काठमाडौं ।
जम्मू-कश्मीरको किश्तवाड जिल्लाको पड्डर सब-डिभिजन अन्तर्गत पर्ने चशोटी गाउँमा बिहीबार दिउँसो १२:३० बजे ‘क्लाउड ब्रस्ट’ (बादल फाट्ने) भएको छ। पहाडबाट आएको पानी र माटोको ढिस्कोमा परी धेरै मानिसहरू फसेका छन्। समाचार एजेन्सी पीटीआईका अनुसार, यो दुर्घटनामा १२ जनाको मृत्यु भएको छ । उनीहरूको शव पनि फेला परेको छ। २५ जनाभन्दा बढी मानिस घाइते भएका छन् र मृतकको संख्या बढ्न सक्ने अनुमान गरिएको छ। हजारौं तीर्थयात्री मचैल माता यात्राका लागि चशोटी गाउँमा जम्मा भएको बेला यो घटना भएको थियो। यो यात्राको पहिलो बिसौनी हो। क्लाउड ब्रस्ट भएको ठाउँबाट नै यात्रा सुरु हुनेवाला थियो। त्यहाँ तीर्थयात्रीहरूका बस, टेन्ट, लंगर (सामुदायिक भोजनालय) र धेरै पसलहरू थिए। बाढीको पानीले ती सबै बगाएको छ।मचैल माता तीर्थयात्रा हरेक वर्ष अगस्टमा हुन्छ र यसमा हजारौं श्रद्धालु सहभागी हुन्छन्। यो यात्रा जुलाई २५ देखि सेप्टेम्बर ५ सम्म चल्नेछ। यो रुट जम्मूदेखि किश्तवाडसम्म २१० किलोमिटर लामो छ र यसमा पद्दरदेखि चशोटीसम्मको १९.५ किलोमिटर सडकमा सवारी साधन चल्न सक्छन्। त्यसपछि मचैलसम्म ८.५ किलोमिटरको पैदल यात्रा हुन्छ। उता, हिमाचल प्रदेशका अधिकांश क्षेत्रमा बुधबार राति भारी वर्षा भएको छ। कोटखाईको खलटूनालाको पहाडमा बिहान ३ बजे बादल फाट्दा खोलामा माटोको ढिस्को आएको छ। यसले गर्दा एउटा पेट्रोल पम्प र ६ वटाभन्दा बढी गाडीहरू पुरिएका छन्। पम्पमा काम गर्ने कर्मचारीहरूले भागेर ज्यान बचाएका थिए। हिमाचल प्रदेशको कुल्लु र शिमलामा पनि बुधबार साँझ ४ ठाउँमा क्लाउड ब्रस्ट भएको थियो। कुल्लुको श्रीखण्ड र तीर्थन भ्याली, शिमला जिल्लाको फाचाको नान्टी गाउँ र काशापाठमा बादल फाटेपछि नदी र खोलाहरूमा बाढी आएको छ। हिमाचल प्रकोप व्यवस्थापन प्राधिकरणका अनुसार, पछिल्लो २४ घण्टामा वर्षा र यससँग सम्बन्धित घटनाहरूका कारण ३९६ वटा सडकहरू बन्द भएका छन्।