झण्डै ६ महिनापछि आन्तरिक हवाई सेवा शुरु

५ असोज, काठमाडौं । कोरोना भाइरसको महामारीले सिङ्गो विश्वसंगै नेपाल पनि आक्रान्त बनेपछी सरकारले जारी गरेको लकडाउनका कारण झण्डै ६ महिनादेखि बन्द रहेको आन्तरिक हवाई सेवा आज सोमबारबाट सुरू भएको छ ।

सरकारले आन्तरिक व्यवसायिक उडानलाई अनुमति दिएसँगै आजबाट आन्तरिक हवाई सेवा सुचारु भएको हो ।

१ अक्टोबरपछि मागका आधारमा उडान तालिका थपघट हुनेगरि हाललाई साविकको तुलनामा २५ प्रतिशत उडान हुने नेपाल नागरिक उड्डयन प्राधिकरणले जनाएको छ । सामाजिक दुरी कायम गरी पूर्ण स्वास्थ्य सतर्कता अपनाएर हवाई यात्रा सेवा शुरु भएको विमानस्थल कार्यालयले जनाएको छ ।

पहिलो चरणमा दैनिक ४३ वटा उडानलाई अनुमति दिइएको नेपाल नागरिक उड्डयन प्राधिकरणले जानकारी दिएको छ । आजबाट सुगममा बुद्ध एयरले १६, यतीले १०, श्रीले ६ तथा सिम्रिक र सौर्यले १–१ उडानको अनुमति पाएका छन् ।
तस्विर–गुगल