पोखरा ।
रसुवाको भोटेकोसी नदी आएको बाढीमा परेर पोखराका गोविन्दबहादुर अधिकारी सम्पर्कविहीन छन् ।
भदौ १० गतेको बाढीमा परेर सम्पर्कविहीन भएका रसुवाको टिमुरे भन्सार कार्यालयका सवारीचालक अधिकारीलाई परिवारजनले खोजी गर्दा घटनास्थलको अवस्था देखेपछि शुक्रबार रामघाटस्थित सेती नदीमा कुशको शव बनाएर दाहसंस्कार गरेका छन् ।
रसुवाको टिमुरेस्थित भन्सार कार्यालयमा कार्यरत पोखरा–१४ समावेशी टोलका ४७ वर्षीय गोविन्दबहादुर अधिकारी यसपटक तीजमा घर आउने योजनामा थिए ।
भदौ ९ गते साँझ भिडियो कलमार्फत परिवारसंग कुराकानी गरेका उनी भोलिपल्ट भोटेकोसी नदीमा आएको विनाशकारी बाढीमा परेपछि उनको तीजमा घर योजना अधुरै रह्यो । बाढी आएको दिन भदौ १० गतेदेखि अधिकारी सम्पर्कविहीन छन् ।
टिमुरे भन्सार कार्यालयमा सवारीचालकका रूपमा कार्यरत अधिकारी करिब ६ महिनाअघि पोखरा विमानस्थल भन्सार कार्यालयबाट टिमुरे सरुवा भएका थिए । बाढी आएको दिन बिहानसम्म परिवारसँग सम्पर्कमा रहेका उनी त्यसपछि बेपत्ता भए ।
परिवारले उनको खोजीमा विभिन्न अस्पताल तथा शव राखिएका स्थानसम्म पुगेर खोजी गरेका थिए ।
धादिङमा भेटिएको शवको तस्बिर अधिकारीसँग मिल्दोजुल्दो देखिएपछि परिवार त्यहाँसमेत पुगेको थियो । तर हातमा रहेको ट्याटुका आधारमा उक्त शव अधिकारीको नभएको पुष्टि भयो ।
त्यसपछि बिहीबार टिमुरे पुगेर घटनास्थलको अवस्था हेरेपछि परिवारले उनको जीवितै फर्किने आश मारेको हो ।
लामो समयसम्म कुनै खबर नआएपछि परिवारले शुक्रबार पोखराको रामघाटस्थित सेती नदीमा हिन्दु संस्कारअनुसार कुशको शव बनाएर अन्त्येष्टि गर्दै काजकिरिया सुरु गरेको छ ।
मुरली बजाउन रुचाउने अधिकारीको सम्झनामा परिवारले कुशको शवसँगै एउटा मुरली पनि राखेको छ ।
भदौ १० को बाढीपछि पोखराका १२ जना अझै सम्पर्कविहीन रहेको कास्की प्रशासनले जनाएको छ । तीन जना भने पछि परिवारको सम्पर्कमा आएका छन् ।
प्रकाशित मिति २०८३ भदौ २० गते शनिबार १२:५०
