नेपालगन्ज : भारतबाट फर्केकाहरुसँगै कोरोना गाउँगाउँमा नपुगोस् भन्दै नाकामै कोरोना भाइरसको परीक्षणका लागि खटिएका स्वास्थ्यकर्मी नै संक्रमित हुन पुगेका छन् ।
पछिल्लो केही दिनयता नेपालगन्जको जमुनाह नाकाबाट घर फर्किने नेपालीको संख्या ह्वात्तै बढेको छ । उनीहरु फर्किएसँगै नेपालमा कोरोना संक्रमणको जोखिमसमेत बढेको छ ।
नेपालगन्जस्थित नेपाल–भारत सीमानाका जमुनाहामा कार्यरत दुई जना स्वास्थ्यकर्मीमा कोरोना संक्रमण पुष्टि भएको छ । जमुनाह नाकामा रहेको हेल्थ डेक्समा कार्यरत दुई जना स्वास्थ्यकर्मीमा कोरोना संक्रमण पुष्टि भएको जिल्ला कोभिड–१९ संकट व्यवस्थापन केन्द्रका फोकल पर्सन तेज ओलीले बताए ।
हेल्थ डेस्कमा कार्यरत एक जना ल्याबका कर्मचारी र अर्का पारामेडिक्समा कोरोना पुष्टि भएको उनले बताए । संक्रमित दुवै जना स्वास्थ्यकर्मीमा सामान्य रुघाखोकीको लक्षण देखिएको छ । हेल्थ डेस्कमै खटिएका कर्मचारी कोरोनाबाट संक्रमित हुन थालेपछि अब नाकामा स्वास्थ्य जाँच गर्न स्वास्थ्यकर्मीको अभाव हुन सक्ने ओलीले बताए ।
नाकामा १७ जना स्वास्थ्यकर्मी परिचालन गरिएको छ । जो दुई सिफ्टमा ड्युटी गर्छन् । मास्क, एप्रोन लगाएर काम गरिरहेका स्वास्थ्यकर्मीमा समेत कोरोनाको जोखिम छ ।भीड व्यवस्थापनलाई सहज बनाउन स्वास्थ्यकर्मीलाई नै सकस छ । १७ जनामा चार जना मात्र ल्याब टेक्निसियन छन् ।
भारतमा कोरोना भाइरसको संक्रमण तीव्र बनेसँगै रोजगारीका लागि भारत पुगेका नेपालीहरु घर फर्किन थालेका हुन् । भारतको दिल्ली, महाराष्ट्र, चण्डीगढ, हैदराबाद, चेन्नईबाट आएका व्यक्तिमा कोरोना संक्रमण देखिएको छ।
प्रकाशित मिति २०७८ पुस २७ गते मंगलबार ११:४९
