सहकारीका प्रमुखमाथि गोली प्रहार

सर्लाही

सर्लाहीमा सहकारी प्रमुखलाई गोली हानिएको छ । सगुन बचत तथा ऋण सहकारी संस्था हरिवनको सेवा केन्द्रका प्रमुखमाथि लुटेरा समूहले गोली प्रहार गरेको हो। लुटेराको समूहले वागमती नगरपालिका–१, मिलनचोकमा रहेको सेवा केन्द्रका प्रमुख साजन कार्कीमाथि ४ गोली प्रहार गरेका हुन् । ३ जनाको समूहमा आएका लुटेराले सेवा केन्द्रको कार्यालयभित्र पसेर प्रमुख कार्कीलाई पैसाको लागि धम्क्याएपछि कार्कीले प्रतिकार गरेको र त्यस लगत्तै गोली हानेका थिए । आज बिहान साढे १० बजेतिर लुटेराको समूह सेवा केन्द्रमा पुगेको हो ।

भारतीय नम्बर प्लेटको एउटै मोटरसाइकलमा चढेर उनीहरु भागेका छन् । तिघ्रा, कुम, ढाड र कोखामा गोली लागेका घाइते कार्कीको हरिवनस्थित सरस्वती अस्पतालमा प्राथमिक उपचार पश्चात् थप उपचारका लागि पठाइएको प्रहरीले बताएको छ । लालबन्दी–२ जुटपानी निवासी कार्कीलाई ४ गोली लागे पनि शरिरको संवेदनशिल भागमा नपरेकाले धेरै खतरा नदेखिएको अस्पतालले बताएको छ ।