माछाका भुरा किन्न मत्स्य केन्द्रमा किसानको भिड

पोखरा

कास्की लेखनाथमा रहेको मत्स्य अनुसन्धान केन्द्रमा अहिले प्रत्येक शुक्रबार किसानको भीड लाग्ने गरेको छ । अनुसन्धान केन्द्रमा रहेका शुद्ध नश्ल विभिन्न प्रजातिका माछाका भुराहरुलाई किन्न किसानहरुकोे भीड लाग्ने गरेको हो ।

गण्डकी प्रदेशका विभिन्न ठाउँबाट किसानहरुले व्यवसायिक माछापालनका लागि भुरा किनेर लैजाने गरेका छन् । माछापालनका लागि किसानलाई परामर्शको काम पनि केन्द्रले गरिरहेको छ ।

विगत १० वर्षदेखि स्याङजा बिरुवामा व्यवसायिक माछापालन गरिरहेका रुपेश हमाल शुक्रबार माछाका भुरा किन्न केन्द्रमा पुगेका थिए ।

कामको खोजीमा कुनै बेला विदेश पुगेका हमाल अहिले स्वदेशमा माछा पालन गरेर सन्तुष्ट छन् ।

केन्द्रका प्रमुख मोहम्मद इक्बाल हुसेनका अनुसार केन्द्रबाट बर्सेनी २० देखि २५ लाख शुद्ध नश्लका माछाका भुराहरु किसानलाई बिक्रि वितरण गरिन्छ । उनले माछापालनमा इच्छुक किसानका लागि सहजीकरण पनि केन्द्रले गरिरहेको जानकारी दिए ।