विदेशीको निधारमा टीका, गलामा माला र शिरमा ढाका टोपी

पोखरा

पोखरा घुम्न आएका विदेशी पर्यटकले भाइटीका लगाएका छन् । तिहारको अवसरमा पोखरा होटल संघले आयोजना गरेको भाइटीका महोत्सवमा उनीहरुले टीका लगाएका हुन् ।

बिहीबार भाइटीका दिने ३५ विदेशी पर्यटकले टीका लगाएको होटल संघ पोखराका अध्यक्ष लक्ष्मण सुवेदीले बताए ।

लेकसाइडस्थित मम्स गार्डेन रिसोर्टमा आयोजित महोत्सवमा विदेशी पर्यटकलाई रेन्बो चिल्ड्रेन नेपालका दिदीबहिनीहरूले टीका लगाइदिएका हुन् । १५ औं भाइटिका महोत्सवमा जापान, स्वीटजरल्याण्ड, अमेरिका, फ्रान्स, जर्मनी, भारत लगायतका पर्यटकले भाइटीकासँगै माला, ढाकाको टोपी लगाएका थिए ।

तिहारको सांस्कृति पक्षलाई संरक्षण गर्नुएका साथै यसको माध्यमबाट पर्यटन प्रवद्र्धन गर्दै पर्यटन क्षेत्रमा आशा जगाउने उद्देश्यका साथ महोत्सव आयोजना गरिएको सुवेदीले बताए ।

कोरोनाका कारण विगतका २ वर्ष हुन नसकेको महोत्सवलाई यो वर्ष निरन्तरता दिइएको हो । महोत्सले आपसी भाइचारा अभिवृद्धि गर्दै पर्यटन पुनरुत्थानमा सघाउने सुवेदीको भनाइ छ ।