काँग्रेस केन्द्रीय समिति बैठक असोज २५ सम्म स्थगित

काठमाडौं । सोमबारका लागि तय भएको नेपाली काँग्रेसको केन्द्रीय समिति बैठक २५ गतेसम्मका लागि स्थगित गरिएको छ । ७ जना केन्द्रीय सदस्यमा कोरोनाभाइरसको संक्रमण पुष्टि भएपछि हाललाई बैठक स्थगित भएको काँग्रेस पार्टी कार्यालयका मुख्यसचिव कृष्णप्रसाद पौडेलेले जानकारी दिए । सोमबारको बैठक असोज २५ गते बस्नेगरी स्थगित भएको हो ।

असोज १५ गते गरिएको पिसिआर परिक्षणका क्रममा पार्टीका केन्द्रीय सदस्यहरु अर्जुननरसिंह केसी, गगनकुमार थापा, जंगीलाल राय, कल्पना चौधरी र आमन्त्रित केन्द्रीय सदस्य शम्भुलाल श्रेष्ठमा कोरोना संक्रमण देखिएको छ । केन्द्रीय सदस्यहरु– रमेश रिजाल र अजयकुमार चौरसियामा पनि कोरोना पुष्टि भएको छ ।

काँग्रेसले कोभिड—१९ पोजिटिभ देखिएका केन्द्रीय सदस्य, आमन्त्रित सदस्य एवं अन्य सबैको शीघ्र संक्रमण मुक्तिका लागि कामना गरेको छ ।