धनुषामा श्रीमानद्वारा बन्चरो प्रहार गरी श्रीमतीको हत्या

धनुषा

धनुषामा श्रीमानले बन्चरोले हानेर आफ्नै श्रीमतीको हत्या गरेका छन् । घरमा सुतिरहेको अवस्थामा धनुषाको बटेश्वर गाउँपालिका वडा नंं. ५ शान्तिपुरकी २७ वर्षीया श्रीमती रीतादेवी यादवको श्रीमान वीरेन्द्र यादवले हत्या गरेका हुन् ।श्रीमतीकाे हत्या आरोपमा यादवलाई प्रहरीले पक्राउ गरेको छ ।

प्रहरीका अनुसार आइतबार राति यादवले रीतादेवीलाई सुतिरहेको अवस्थामा बञ्चरोले हानी घाइते बनाएर अर्को घरमा सुत्न गएका थिए । घटनालाई ढाकछोप गर्न केही बेरपछि घरमा आएर श्रीमतीलाई उपचारको लागि काव्या अस्पताल उनैले लगेका थिए ।

अस्पताल लगिएपनि रीतादेवीको उपचारको क्रममा मृत्यु भएको इलाका प्रहरी कार्यालय सखुवा महेन्द्रनगरले जानकारी दिएको छ । श्रीमतीलाई बन्चरो प्रहार गरेको यादवले स्वीकार गरेको प्रहरीको भनाइ छ । रीतादेवीको हत्या हुनु अघि घरमा बिजुली काटिएको थियो । घटनाबारे थप अनुसन्धान भइरहेको प्रहरीको भनाइ छ । प्रहरीका अनुसार यादवले किन श्रीमतीको हत्या गरे अनुसन्धान भइरहेको छ ।