पोखरा महोत्सवमा पिछडिएका, जनजाति र एकल महिलालाई स्वरोजगार तालिम

पोखरा

पोखरा महोत्सवमा स्वरोजगार तालिम प्रदान गरिने भएको छ । आगमी पुसको २७ देखि माघको ९ गते सम्म पोखराको अमरसिंह चौरमा आयोजना हुने एघारौं संस्करणको पोखरा महोत्सवमा विशेष गरी पिछडिएका, जनजाति र एकल महिलाहरुलाई लक्षित गरी स्वरोजगार तालिम प्रदान गर्न लागिएको हो ।

महोत्सव अवधिभर सञ्चालन हुने तालिममा जाडो यामलाई लक्षित गरी स्विटर, मोजा, टोपी, गलबन्दी, पञ्जा लगायतका सामग्रीहरु निर्माण सम्बन्धी तालिम प्रदान गरिने एघारौं पोखरा महोत्सव हस्तकला व्यवस्थापन उपसमिति संयोजक सविता श्रेष्ठ रञ्जितले जानकारी दिइन् ।

श्रेष्ठका अनुसार प्राविधिक शिक्षालय (सिटिइभिटी) को प्राविधिक सहयोगमा २० जनालाई उक्त तालिम दिइने छ । महोत्सव अवधिभर १२ दिन तालिम प्रदान गरिने र स्वरोजगार हुन चाहनेलाई दुई महिने निशुल्क तालिम समेत प्रदान गरिने बताइन् । तालिममा सहभागी हुन चाहनेहरुले पुष २५ भित्र युनाइटेड क्लबको कार्यालयमा सम्पर्क गर्न समेत संयोजक श्रेष्ठले आग्रह गरेकी छन् ।