नेपाली नाटक जापानको रंगमञ्चमा

पोखरा

पोखराको ईन्द्रेणी थिएटरले तयार पारेको नाटक ‘इम्ब्रियोनिक’ जापानमा मञ्चन हुने भएको छ । जापानको इताबासीमा रहेको सबटेरेनियन थिएटरमा नाटक मञ्चन गरिने ईन्द्रेणी थिएटरका अध्यक्ष केदारनाथ पौडेलले बताए ।

उनका अनुसार अप्रिल ८ र ९ तारिखमा नाटक मञ्चन हुनेछ । नाटकमा मानव विकासक्रम र अन्त्यसम्मको संघर्ष गाथा समेटिएको निर्देशक समेत रहेका पौडेलले जानकारी दिए । ‘यदी मानिस फुल भए के हुन्थ्यो ? मानिस खोला भए के हुन्थ्यो ? मानिस बादल भए के हुन्थ्यो ? यस्ता अनेक प्रश्न सबैको दिमागमा उब्जिन्छन् । यिनै प्रश्नको पेरीफेरिमा नाटक छ’, उनले भने ।

पोखरा काठमाडौंको मण्डला थिएटरमा भएको नेपाल इन्टरनेशनल थिएटर फेस्टिभलमा पनि यो नाटक प्रदर्शन भएको थियो ।