मकाउका लागि बिदाइ गरेको छोरो रुसी फौजमा
पाेखरा
अघिल्लो रात काठमाडौंमा सँगै बसेर मकाउका लागि असोज २ गते छोरा साजनलाई बिदाइ गरेका बाबु श्रीमान गुरुङ यतिबेला विक्षिप्त बनेका छन् ।
मकाउ जान्छु भनेपछि हार्न नसकेका लमजुङ दूधपोखरी–१ बाबु श्रीमानलाई छोरा साजन रुसी फौजमा भर्ती भएर ज्यान गएको खबर पाएका हुन् ।
श्रीमान आफैं दूधपोखरी वडा नम्बर १ मा निर्वाचित वडा सदस्य हुन् ।
कृषि क्षेत्रमा राम्रो अवसर आएको छ भनेर आफैंले काठमाडौं पुगेर बिदाइ गरेको छोरो साजन नै रुसी फौजमा सामेल हुन जाला भन्ने बाबुले कल्पनासमेत गरेका थिएनन् ।
१२ कक्षा पास गरेको, राजनीतिसमेत चासो राख्ने छोराले बुझेरै गयो होला भन्ने लागेको बताउँदै उनले फौजी पोशाकमा छोरोको फोटो फेसबुकमा देखेपछि उनले म्यासेन्जरमा कल गरेको जानकारी दिए ।
त्यसपछि जसरी पनि त्यहाँबाट भागेर आउन आफूले आग्रह उनले सुनाए । रुसी सेनामा भर्ती भएपछि उम्किन सम्भवै नरहेको छोराले जानकारी दिएको जनप्रतिनिधिसमेत रहेका बाबु श्रीमानले बताए ।
उनले यसअघि उनै साजनलाई मलेसियाबाट फर्काएका थिए । मलेसियाबाट फर्काए पनि मकाउ जाने भन्दै रुस पुगेपछि फर्काउन नसकेकोमा उनी यतिबेला विक्षिप्त छन् ।
साजन गरेको खबर आएपछि गुरुङ संस्कारअनुसार ३ दिन क्रिया कर्म गर्ने भए पनि छोराको एक दिनमै टुंग्याएको उनले बताए ।
तर, छोरा मरेको छ भन्ने अझै विश्वासै नलागेको उनको भनाइ थियो । उनले सरकारी निकायबाट आधिकारिक जानकारीको लागि पनि अपिल गरेका छन् ।
प्रकाशित मिति २०८० माघ २ गते मंगलबार ०५:४२
