त्रिकोणात्मक टी–२० सिरिज फागुन १५ देखि: नेपालले पहिलो खेल नामिबियासँग खेल्ने

पोखरा ।

नेपालले त्रिकोणात्मक टी–२० सिरिजको पहिलो खेल नामिबियासँग खेल्ने भएको छ ।

खेल कीर्तिपुरस्थित त्रिवि क्रिकेट मैदानमा आगामी फागुन १५ गते हुने छ ।

नेपाल क्रिकेट संघ (क्यान)ले शुक्रबार सिरिजको खेल तालिका सार्वजनिक गरेको हो ।

डबल राउण्ड रोबिनका आधारमा हुने सिरिजमा नेपालले दोस्रो खेल फागुन १६ गते नेदरल्याण्ड्ससँग खेल्नेछ ।

त्यस्तै लिग चरणको तेस्रो खेल फागुन १८ गते नामिबियासँग तथा लिग चरणको अन्तिम खेल फागुन १९ गते नेदरल्याण्ड्ससँग खेल्ने तालिका रहेको क्यानले जनाएको छ ।

फागुन २२ गते सिरिजको फाइनल खेल हुनेछ ।

आईसीसी डब्लूसीएल लिग टू अन्तर्गतका म्याच खेल्न नामिबिया र नेदरल्याण्ड्स नेपाल भ्रमणमा आउदैछन् ।

लिग-टू अन्तर्गतको पहिलो सिरिज सकेर सोही टिमसँग टी–२० सिरिज खेल्ने व्यवस्था क्यानले मिलाएको हो ।