अब बन्ने भवनलाई भने महेन्द्रपुल क्षेत्रमै पनि ३० मिटर मापदण्ड
पोखरा
पोखरा महानगरपालिकाले बनाएको नयाँ भवन तथा पूर्वाधार मापदण्डले सेती नदीको मापदण्ड २० मिटर घटाएको छ । सेती नदीको मापदण्ड ३० मिटरमा घटाइएको हो ।
भूकम्पपछि जारी बस्ती विकास, सहरी योजना तथा भवन निर्माण सम्बन्धी आधारभूत निर्माण मापदण्ड, २०७२ ले सेतीको मापदण्ड ५० मिटर कायम गरेको थियो ।
पोखरा महानगरपालिकाले हालै सार्वजनिक गरेको नयाँ मापदण्डमा २० मिटर घटाइएको छ ।
सेती नदीको सवालमा पुरनचौरदेखि कोत्रेसम्म एउटै मापदण्ड तोकेको पोखरा महानगरपालिकाका घर नक्सा शाखा प्रमुख वरिष्ठ इञ्जिनियर सुरेन्द्र पौडेलले बताए । उनका अनुुसार पूरानो मापदण्डमा ५ देखि ५० मिटर तोकिएको थियो ।
पोखराको महेन्द्रपुल क्षेत्रको हकमा भने अहिले पनि ५ मिटर तोकिएको छ । ५ मिटर पुराना संरचनाको हकमा मात्रै लागु हुने पौडेलले जानकारी दिए । अब नयाँ बन्नेलाई ३० मिटर नै मापदण्ड लाग्ने उनको भनाइ छ ।
सेतीसँगै मर्दी, काली, हर्पन, पुँडी र सुरौदी खोलाको पनि ३० मिटर तोकिएको छ । सुइँखेत खोलाको १७ मिटर, पार्दी खोलाको १२.५ मिटर, काँहु र भलाम खोलाको १० मिटर नयाँ मापदण्डले तोकेको छ । बगादी, तालखोला र बेगनासताल खोलाको ७ मिटर लागु हुनेछ ।
फेवातालको सम्बन्धमा भने सर्वोच्च अदालतकोे आदेश अनुसार ६५ मिटर नै कायम हुनेछ । असार ४ गते सर्वोच्चले फेवातालको मापदण्ड ६५ मिटर कायम गर्न आदेश दिएको थियो ।
यस्तै, फिर्केखोलाको पनि मापदण्ड घटाइएको छ । फिर्केको मापदण्ड ६ मिटर तोकिएकोे हो ।बेगनास र रुपातालको हकमा भने चारैतिर सिमानामा एक सय मिटर जग्गाको सतहको बनोट नाप्ने उल्लेख छ । नयाँ मापदण्डले दिपाङ, मैदी, गुदे, खाष्टे, न्युरेनीको ५० मिटर कायम हुनेछ ।
यस्तै, ठुलिपोखरी, कास्कीकोट, कमलपोखरी, बुडुवाफाँट, खुडेपोखरी पस्र्याङ लगायत पोखरीहरुको ६ मिटर मापदण्ड तोकिएको छ ।
प्रकाशित मिति २०८० फागुन १७ गते बिहीबार ०८:०९
