जीवीलाई पक्राउ गर्नुको साटो राज्यले नै लुकाएको पीडितको आशंका
पाेखरा
सूर्यदर्शन सहकारीका पीडितहरुले आफूहरुको बचत फिर्ताको वातावरण बनाइदिन आग्रह गर्दै प्रतिनिधिसभाको राज्य व्यवस्था तथा सुशासन समितिमा उजुरी दिएका छन् ।
सूर्यदर्शन सहकारी पीडितका तर्फबाट संघर्ष समितिका अध्यक्ष किरण श्रेष्ठले राज्य व्यवस्था समितिका सभापति रामहरि खतिवडालाई ज्ञापन पत्र बुझाउँदै वचत फिर्ताको वातावरण बनाइदिन आग्रह गरेका हुन् ।
सूर्यदर्शन सहकारीमा दुई वर्षयता १८ हजार ७०० जना वचतकर्ताको १ अर्ब ४० करोड रुपैयाँ फिर्ता पाउन बाँकी रहेको भन्दै उनले यसको फिर्ताका लागि पहल गरिदिन आग्रह गरेका हुन् ।
सञ्चालक समितिका पदाधिकारीविरुद्ध उजुरी दिए पनि सहकारीका अध्यक्ष जीबी राईसहित १४ जना अझै फरार रहेको र सरकारले उनीहरुलाई पक्राउ गर्न चासो नदिएको अध्यक्ष श्रेष्ठले बताए ।
कानुनी प्रक्रियामा गएको पनि आठ महिना भइसकेको तर यो राज्यका प्रतिनिधिले सुशासनको कुरा गरिरहँदा सुशासन होइन, कुशासनको चपेटामा परिरहेका श्रेष्ठको भनाइ थियो ।
अध्यक्ष श्रेष्ठले सूर्यदर्शन सहकारीका अध्यक्ष जीबी राईलाई कसले लुकाएको छ भनी प्रश्न गरेका छन् । जीवीलाई पक्राउ गर्नुको साटो राज्यले नै लुकाएको पीडितको आशंका छ ।
जीबीलाई पक्राउ गरेर ल्याउँदा कसलाई नाफा नोक्सान हुन्छ भन्ने जवाफ चाहिएको श्रेष्ठले बताए ।
सूर्यदर्शनका वचतकर्ताले आन्दोलन सुरु गरेपछि ३/४ पटक सरकार परिवर्तन भए तर अहिलेसम्म पीडितको समस्या समाधान नभएको श्रेष्ठले बताए ।
गलत नियत भएका मान्छेले सुनियोजित ढंगले सहकारीको बचत दुरुपयोग गर्दा हजारौंले विगतमा आफैंले जम्मा गरेको रकम आफू संकटमा पर्दा फिर्ता पाउन नसकेको भनाइ छ ।
सूर्यदर्शन सहकारीको विभिन्न व्यक्ति र संस्था अहिले पनि अनुसन्धानबाहिर रहेको भन्दै श्रेष्ठले कास्कीमा दिइएको पुरक निवेदन र अहिलेसम्मको अध्ययनअनुसन्धानलाईसमेत आधार बनाएर समितिमा उजुरी दिइएको श्रेष्ठले बताए ।
पीडितले रविमाथि पनि अनुसन्धान गर्नुपर्ने माग राखेका छन् ।
