२० वर्षमुनिको काभा महिला भलिबल : नेपालले आज किर्गिस्तानसँग खेल्दै

पोखरा ।

काभा यू–२० महिला भलिबल च्याम्पियनसिपमा नेपालले आज आफ्नो दोस्रो खेलमा किर्गिस्तानसँग खेल्दैछ ।

नेपाल र कीर्गिस्तानबीचको खेल नेपाली समय अनुसार राति ९ः१५ बजे मालेस्थित सोसियल सेन्टर कभर्डहलमा हुनेछ ।

पहिलो खेलमा श्रीलंकासँग पराजित भएको नेपाली टोली पहिलो जितको खोजीमा छ ।

श्रीलंकासँग नेपाल ३–१ को सेटमा पराजित भएको थियो । उता किर्गिस्तानले भने पहिलो खेलमा घरेलु टोली माल्दिभ्सलाई सोझो सेटमा पराजित गरेको थियो ।

नेपालले पहिलो खेलमा रिसिभ र डिफेन्समा राम्रो प्रदर्शन गर्न सकेन । पहिलो खेलमा स्पाईकर सलिना बुढामगर र मिना सुनारबाहेक अन्य खेलाडीको प्रदर्शन राम्रो हुन सकेनन् ।

चार टोली सहभागी प्रतियोगितामा नेपालले लिगको अन्तिम खेल शनिबार माल्दिभ्ससँग खेल्नेछ । लिगमा जस्तो नतिजा आएपनि चारै टोलीले सेमिफाइनल खेल्नेछन् ।

सेमिफाइनलमा लिगमा पहिलो हुनेले चौथोसँग र दोस्रो हुनेले तेस्रोसँग खेल्नेछ ।

सेमिफाइनल विजेताबीच फाइनल खेल हुनेछ । प्रतियोगिताको फाईनल खेल ८ गते मंगलबार हुनेछ ।