पोखरा ।
एएफसी यू–२० एसिया कप छनोटमा नेपाल उज्बेकिस्तानसँग पराजित भएको छ ।
न्यु ताइपेई सिटीमा आज भएको खेलमा नेपाल उज्बेकिस्तानसँग ६–० गोलले पराजित भएको हो ।
खेलको २० औं मिनेटमा सबिन घिमिरे रातो कार्ड पाउँदै मैदानबाट बाहिरिएपछि नेपाली टोली १० खेलाडीमा सीमित भएको थियो । उनले बल रोक्ने क्रममा हातले छोएपछि रेफ्रीले रातो कार्ड देखाए ।
समूह ’बी’ मा रहेको नेपाल पहिलो खेलमा कम्बोडियासँग ४–१ गोलले पराजित भएको थियो । यस्तै दोस्रो खेलमा नेपालले घरेलु टोली चाइनिज ताइपेईलाई ३–१ गोलले हराएको थियो ।
यो हारसँगै नेपालको एसिया कपमा छनोट हुने सम्भावना कमजोर भएको छ ।
हारले शीर्ष स्थानमा पुग्ने सम्भावना सकिएको छ भने दोस्रो हुने सम्भावना पनि कमजोर भएको छ ।
नेपाल ३ खेलमा ३ अंकसहित तालिकाको चौथो स्थानमा छ । उज्बेकिस्तान २ खेलमा ६ अंकसहित शीर्ष स्थानमा छ ।
समूहबाट शीर्ष हुने टोली यू–२० एसिया कप २०२५ मा छनोट हुनेछ । दोस्रो हुने टोलीको पनि एसिया कपमा पुग्ने सम्भावना छ ।
अब नेपालले समूहको अन्तिम खेलमा शुक्रबार बहराइनसँग खेल्नेछ ।
प्रकाशित मिति २०८१ असोज ९ गते बुधबार ०५:४८
