एनपीएल : जनकपुर बोल्ट्स र पोखरा एभेन्जर्स खेल्दै

काठमाडौं ।

नेपाल प्रिमियर लिग (एनपीएल) क्रिकेटमा आजको पहिलो खेल जनकपुर बोल्ट्स र पोखरा एभेन्जर्सबीच हुँदैछ ।

पहिलो खेलमा जनकपुर बोल्ट्स पहिले बलिङ गर्दै छ । टस जितेपछि जनकपुर बोल्ट्सले बलिङ् राजेको हो ।

जनकपुरको नेतृत्व अनिल साहले गर्दैछन् भने पोखराको नेतृत्वमा कुशल भुर्तेल छन् ।

आफ्नो पहिलो खेलमा चितवन राईनोजसँग ८७ रनको फराकिलो अन्तरको हार व्यहोरेको कुशल भुर्तेलको कप्तानीमा रहेको पोखरा एभेन्जर्स आज पहिलो जितको खोजीमा रहँदा जनकपुर अपराजित यात्रा कायम राख्ने लक्ष्यमा मैदानमा उत्रेको छ ।

जनकपुर यो लिगकै बलियो टोलीका रुपमा देखा परेको छ । पहिलो खेलमा विराटनगरलाई र दोस्रो खेलमा कर्णाली याक्सलाई समान ८–८ विकेटले हराएको जनकपुर लगातार तेस्रो जितको खोजीमा छ ।

आजै हुने अर्को खेलमा काठमाडौं गुर्खाज र सुदूरपश्चिम रोयल्स प्रतिस्पर्धा गर्नेछन् । यी दुई टोलीबीचको खेल दिउँसो १ बजे हुनेछ ।

पहिलो खेलमा चितवनसँग ५ विकेटले हारेको काठमाडौंले दोस्रो खेलमा कर्णालीलाई ३ विकेटले हराएको थियो ।