सुनको भाउमा नयाँ कीर्तिमानः तोलाको एक लाख ७१ हजार तीन सय पुग्यो

लगातार बढिरहेको सुनको भाउले आज नयाँ कीर्तिमान बनाएको छ । सुन अहिलेसम्मकै उच्च विन्दुमा पुगेर तोलाको एक लाख ७१ हजार तीन सय रुपैयाँमा कारोबार भइरहेको नेपाल सुनचाँदी व्यवसायी महासङ्घले जनाएको छ ।

सुनको भाउ आज हिजोको तुलनामा पाँच सय रुपैयाँले बढेको हो । हिजो सुनको भाउ तोलाको एक लाख ७० हजार आठ सय रुपैयाँमा कारोबार भएको थियो ।

सुनको भाउ यही फागुन ८ गते र गएको कात्तिक १५ गते अहिलेसम्मकै उच्च तोलामा एक लाख ७१ हजार रुपैयाँ रहेको थियो । सुनको भन्सार दर घटेसँगै सुनको भाउमा पनि उतारचढाव भइरहेको छ ।

यस्तै चाँदीको भाउ भने आज घटेको छ । चाँदीको भाउ आज १५ रुपैयाँले घटेर तोलाको एक हजार नौ सय ७० रुपैयाँ कायम भएको महासंघले जनाएको छ ।