नेपालले अब यही जुन १० मा लाओससँग उसैको मैदानमा खेल्दै
पोखरा ।
नेपालले अन्तर्राष्ट्रिय मैत्रीपूर्ण फुटबलमा घरेलु टोली हङकङसँग गोलरहित बराबरी खेलेको छ ।
उत्कृष्ट प्रदर्शन गर्दै नेपालले हङकङ नेसनल स्टेडियममा बिहीबार भएको खेलमा हङकङलाई गोलरहित बराबरीमा रोकेको हो ।
घरेलु मैदानमा हङकङले नेपालमाथि लगातार आक्रमण गरेपनि नेपाली कप्तान गोलकिपर किरण चेम्जोङले केही राम्रा बचाउ गर्दा गोल गर्न सकेन ।
पहिलो हाफमा हङकङको दुई प्रहार नेपालका किपर किरणले बचाएका थिए । दोस्रो हाफमा पनि हङकङले नेपालमाथि लगातार दबाब बनाएपनि नेपालले गोल गर्न दिएन ।
दोस्रो हाफमा पनि नेपाली गोलकिपर किरणले केही राम्रा बचाउ गर्दा हङकङ गोल गर्नबाट बन्चित रह्यो ।
नेपालका मणि लामा इन्जुरी टाइममा रातो कार्डको सामना गर्दै मैदान बाहिरिएका थिए । नेपालले ३७ वर्षपछि हङकङसँग फुटबल खेलेको हो ।
एएफसी एसियन कप छनोटको तयारस्वरुप यो मैत्रीपूर्ण खेल खेलिएको हो । नेपालले पनि खेलमा केही राम्रा अवसर बनाएपनि फिनिसिङ गर्न सकेन ।
एसियन कप छनोटमा समूह एफमा रहेको नेपालले अब यही जुन १० मा लाओससँग उसैको मैदानमा खेल्नेछ ।
नेपाली टोली उतैबाट लाओस जानेछ ।
छनोटको समूह सी मा रहेको हङकङले जुन १० मै घरेलु मैदानमा भारतसँग खेल्नेछ ।
फिफा वरीयतामा नेपाल १७५ औं स्थानमा रहँदा हङकङ नेपालभन्दा २२ स्थान माथि १५३ औं स्थानमा रहेको छ ।
प्रकाशित मिति २०८२ जेठ २४ गते शुक्रबार ०९:२३
