जेन–जी आन्दोलनमा एमालेका ६४ कार्यालयमा ताेडफाेड र आगजनी

काठमाडौँ ।

जेन–जी आन्दोलनका क्रममा नेकपा एमालेको केन्द्रीय कार्यालयसहित देशभरका ६४ पार्टी कार्यालयमा तोडफोड र आगजनी भएको छ। त्यस्तै, सो पार्टीका नेता तथा कार्यकर्ताका १५८ भन्दा बढी घर र व्यवसायमा क्षति पुगेको एमालेले जनाएको छ।

पार्टी महासचिव शंकर पोखरेलले बुधबार बसेको केन्द्रीय कार्यालय बैठकपछि सामाजिक सञ्जालमार्फत जानकारी दिँदै आगजनी र तोडफोडबाट प्रभावित अधिकांश कार्यालयमा सरसफाइ र मर्मत–सम्भार सुरु भइसकेको बताए। उनका अनुसार क्षति भएको स्थानमा कार्यकर्ताहरू स्वयंसेवी भावनाका साथ परिचालित भई काम गरिरहेका छन्।

“राष्ट्र, संविधान, संघीय लोकतान्त्रिक गणतन्त्र, पार्टी र आन्दोलनको रक्षा गर्न एमाले पुनः जुरमुराएर उठ्दैछ,” पोखरेलले भने। बैठकले प्राप्त प्रारम्भिक विवरणअनुसार क्षतिको विस्तृत विवरण संकलन भइरहेको पनि उनले स्पष्ट पारे।