पोखरामा ठूलो मात्रामा लागूऔषधसहित दुई जना पक्राउ

पोखरा ।

पोखरामा ठूलो मात्रामा लागूऔषधसहित दुई जना युवालाई प्रहरीले पक्राउ गरेको छ।

पोखरा महानगरपालिका–१७ छोरेपाटनमा बुधबार राति करिब ८ बजेर ५० मिनेटको समयमा लागूऔषध बिक्री गर्दैगर्दा प्रहरीले उनीहरूलाई नियन्त्रणमा लिएको हो।

पक्राउ पर्नेमा पोखरा–१२ का २२ वर्षीय राहुल घले र पोखरा–१८ का ३१ वर्षीय सुदिप विश्वकर्मा रहेका छन्।जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक हरिबहादुर बस्नेतका अनुसार, पक्राउ परेकाको साथबाट कुल ४४३ एम्पुल लागूऔषध बरामद गरिएको छ।

जसमध्ये डाइजापाम १४९ एम्पुल, फेनारगन १४७ एम्पुल र नुर्फिन १४७ एम्पुल रहेका छन्। साथै, उनीहरूको साथबाट २ थान मोबाइल फोन पनि बरामद गरिएको प्रहरीले जनाएको छ।पक्राउ परेकामाथि लागूऔषध सम्बन्धी मुद्दा दर्ता गरी ५ दिनको म्याद थप गरेर थप अनुसन्धान प्रक्रिया अघि बढाइएको जिल्ला प्रहरीले जनाएको छ।