काठमाडौँ । एसियन सिनियर सेन्ट्रल जोन भलिबल च्याम्पियनसिपमा नेपालको पुरुष टोली श्रीलंकासँग पराजित भएको छ ।
बङ्गलादेशको ढाकामा शनिबार भएको खेलमा नेपाल श्रीलंकासँग ३–१ को सेटमा पराजित भएको हो ।
पहिलो सेट श्रीलंकाले २५–१८ ले जितेकोमा दोस्रो सेट २५–२२ ले जित्दै नेपालले खेल बराबरीमा ल्याएको थियो । तर तेस्रो र चौथो सेट क्रमशः २५–२२ र २५–१६ ले जित्दै श्रीलंका विजयी भयो ।
प्रतियोगितामा नेपालको पुरुष टोलीको यो दोस्रो हार हो ।
पहिलो खेलमा नेपाल बंगलादेशसँग ३–० को सेटमा पराजित भएको थियो। तर, दोस्रो खेलमा उज्वेकिस्तानलाई ३–१ को सेटमा हराएको थियो ।
अब नेपालले आज आइतबार माल्दिभ्सको सामना गर्नेछ । नेपाल र माल्दिभ्सबीचको खेल दिउसो ३ः४५ बजे सुरु हुनेछ ।
महिला टोलीले भने लगातार तेस्रो जित निकालेको छ ।
आयोजक बंगलादेशलाई ३–० को सोझो सेटमा हराउँदै नेपालले लगातार तेस्रो जित निकालेको हो ।
यस जितसँगै नेपाल फाइनल नजिक पुगेको छ ।
अब नेपालले आइतबार उज्वेकिस्तानको सामना गर्नेछ । नेपाल र उज्वेकिस्तानबीचको खेल दिउँसो १ः१५ बजे सुरु हुनेछ ।
प्रतियोगितामा पुरुषतर्फ ५ र महिलातर्फ ६ राष्ट्रको सहभागिता रहेको छ ।
राउण्ड रोबिनको आधारमा हुने प्रतियोगिताको शीर्ष दुई टोलीले फाइनलमा प्रतिस्पर्धा गर्नेछ ।
यस्तै तेस्रो र चौंथो टोलीले तेस्रो स्थानको लागि प्रतिस्पर्धा गर्नेछ ।
प्रकाशित मिति २०७८ पुस ११ गते आइतबार १२:५१
