पोखरा ।
सुनसरीको कप्तानगञ्जमा भएको हत्या प्रकरणलाई लिएर प्रतिनिधि सभामा सरकारको आलोचना भएको छ ।
बिहीबारको प्रतिनिधि सभा बैठकमा विशेष समय लिएर बोल्दै नेपाल कम्युनिष्ट पार्टीका सांसद गोपाल शर्माले उक्त घटनाका सम्बन्धमा प्रधानमन्त्रीले संसदलाई आधिकारिक जानकारी गराउनुपर्ने माग गरेका हुन् ।
सांसद शर्माले कप्तानगञ्जमा भएको ओमप्रकाश मेहताको हत्याले मुलुकलाई तरंगित र स्तब्ध बनाएको उल्लेख गर्दै यस्तो संवेदनशील घडीमा प्रधानमन्त्री स्वयं उपस्थित भएर घटनाको वस्तुस्थिति र समग्र अवस्थाबारे सदनलाई स्पष्ट पार्नुपर्ने बताए ।
प्रधानमन्त्रीको उपस्थिति र सक्रियताबारे उनले प्रश्न उठाए । सम्बोधनका क्रममा सांसद शर्माले गृहमन्त्रीको कार्यशैली र अभिव्यक्तिको पनि चर्को आलोचना गरे ।
गृहमन्त्रीले सार्वजनिक रूपमा ‘कसैलाई यो मन्त्रालय चाहिएको छ भने लैजाऊ’ भनी धम्कीपूर्ण र अराजक अभिव्यक्ति दिएको भन्दै उनले आपत्ति जनाए ।
राज्य अभिभावकको भूमिकामा रहनुपर्नेमा जोड दिँदै शर्माले सुनसरी घटनाको जिम्मेवारी सरकारले लिनुपर्ने माग गरे ।
उनले भने, ‘प्रधानमन्त्री कहाँ हुनुहुन्छ र के गर्दै हुनुहुन्छ भन्ने जानकारी न संसदलाई छ, न त सर्वसाधारणलाई । यस्तो गम्भीर विषयमा प्रधानमन्त्रीले संसदमा आएर जानकारी दिनुपथ्र्यो । कप्तानगञ्ज घटनाको जिम्मेवारी स्थानीय तहलाई दिने हो कि नेपाल प्रहरीले गरेको कामको जिम्मा गृहमन्त्रीले लिने हो ? यसको स्पष्ट जवाफ सदनलाई चाहिन्छ ।’
विगतका घटनाहरूमा राज्य र गृह नेतृत्व संवेदनशील हुनुपर्छ भन्नेहरू नै अहिले जिम्मेवारीबाट पन्छिन खोजेको उनको आरोप छ ।
सांसद शर्माले प्रधानमन्त्रीलाई तत्काल संसदको रोष्टममा उपस्थित भएर यस्ता संवेदनशील घटनाबारे आधिकारिक धारणा सार्वजनिक गर्न र सदनलाई जानकारी गराउन विशेष अनुरोध गरेका छन् ।
प्रकाशित मिति २०८३ साउन १४ गते बिहीबार १२:०८
