एमाले कास्की अधिवेशनः प्यानल नै बनाएर चुनावी मैदानमा

पोखरा । नेकपा (एमाले) को १०औं जिल्ला अधिवेशन कास्कीमा प्यानल नै बनाएर चुनावी मैदानमा उम्मेदवारहरु उत्रिएका छन् । पार्टीले पहिलो प्राथमिकता सर्वसम्मत नै गराउने रणनीति भएपनि कास्की दुई गुट देखिएका कारण चुनाव भएको हो ।

आज विहान मात्र जिल्ला अध्यक्षका उम्मेदवार मनबहादुर गुरुङ र दामोदर बैरागीको प्यानलबाट अन्य पदाधिकारी र सदस्यहरुको नाम लिष्ट नै सार्वजनिक भयो । पार्टीले सामुहिक भोट अपिल नगर्न निर्देशन जारी गरेपनि कास्कीमा सामुहिक भोटको अपिल गरिएको छ ।

एमाले कास्कीको अध्यक्षमा मनबहादुर गुरुङ र दामोदर बैरागी भिड्दै छन् । गुरुङ पृथ्वीसुब्बा गुरुङ र बैरागी खगराज अधिकारी निकट मानिन्छन् ।

यहाँ मतदानका लागि ९ सय १४ मतदाता छन् । ७२ वडा रहेको कास्कीमा भूगोल, संघसंगठन र शुभेच्छुक संस्थाबाट मतदाता छानिएका हुन् । यो चुनावले केन्द्रमा सकिएको भनिएको गुटको विजारोपण पनि गर्दैछ ।