नेकपाको सचिवालय बैठक अनिश्चित

काठमाडौं । आइतबार बस्ने भनिएको सत्तारुढ दल नेपाल कम्युनिस्ट पार्टी (नेकपा) को सचिवालय बैठक अनिश्चित भएको छ । बैठक आइतबार साँझ ४ बजेलाई बोलाइएको थियो । तर, प्रधानमन्त्रीसमेत रहेका अध्यक्ष केपी शर्मा ओलीको निजी सचिवालयका सदस्य तथा निवासको सुरक्षार्थ खटिएका सुरक्षाकर्मीलाई कोरोना संक्रमण पुष्टि भएपछि बैठक बस्ने नबस्ने अनिश्चित भएको हो ।

बैठक स्थगित वा सरेको भनेर सूचना आइसकेको भने छैन । तर, प्रधानमन्त्रीको सचिवालयका ५ जना सदस्यहरुलाई कोरोना भाइरस पुष्टि भएपछि बैठक हुने नहुने कुराको भने अनिश्चितता बढेको छ ।

शनिबार सचिवालयका सदस्यहरुलाई कोरोना संक्रमण पुष्टि भएपछि प्रधानमन्त्री ओलीले तत्काललाई सबै किसिमका भेटघाट बन्द गरेका छन् ।

मन्त्रिपरिषद पुनर्गठन, विभिन्न नियुक्ति, पार्टी एकता लगायतका विषयमा निर्णय गर्न बैठक डाकिएको थियो । सचिवालय बैठक अनिश्चित बनेपछी मन्त्रिपरिषद पुनर्गठन र विभिन्न नियक्तिको प्रकृयासमेत प्रभावित हुने भएका छन ।