गण्डकी दुग्ध विकास बोर्ड उपाध्यक्षमा एमाले नेता तिलक महत नियुक्त

पोखरा

केन्द्रमा फेरिएको सत्ता समीकरणले प्रदेश सरकारसमेत हल्लिइसकेका बेला गण्डकीका मुख्यमन्त्री खगराज अधिकारीले दुग्ध विकास बोर्ड उपाध्यक्षमा एमाले नेतलाई नियुक्त गरेका छन् । यसअघिका सरकार र सदनमा चर्चा, आलोचना र विवादको केन्द्रमा रहेर पनि उपाध्यक्ष नियुक्त हुन नसकेको बोर्डमा मुख्यमन्त्री अधिकारीले एमाले केन्द्रीय सदस्य तथा पूर्वसंघीय सांसद तिलबहादुर महत क्षेत्री (तिलक महत)लाई नियुक्त गरेका हुन् ।

उपाध्यक्षको काम, कर्तव्य र अधिकारसमेत केके हुने भनेर प्रस्ट नभएको बोर्डको ऐन बनेको ५ वर्षपछि मुख्यमन्त्री अधिकारीले आफ्नै गुटका नवलपुरका महतलाई नियुक्त गरेका छन् । मुख्यमन्त्री खगराज अधिकरीको प्रस्तावमा फागुन ११ गते बसेको मन्त्रिपरिषदको बैठकले उपाध्यक्षमा महतलाई नियुक्त गरेको हो । महत मुख्यमन्त्री खगराज नियुक्त भएदेखि नै राजनीतिक सल्लाहकार नियुक्ती हुन सक्ने चर्चासमेत थियो ।

राष्ट्रपतिको निर्वाचनले केन्द्रमा सत्ता समीकरण फेरिएर मुख्यमन्त्री अधिकारीको कुर्ची नै हल्लिएपछि पूर्व संघीय सांसद महतलाई ४ वर्षे कार्यकाल रहने दुग्ध विकास बोर्डको उपाध्यक्ष नियुक्त गरेका हुन् । बोर्डको उपाध्यक्ष प्रदेश सरकारको सहायक मन्त्रीसरह हुने व्यवस्था छ ।
२०७५ साउन ३० गते प्रमाणित भएको ऐन संसद विधेयकका रुपमा दर्ता हुँदादेखि नै विवादित र चासोको केन्द्र बनेको थियो ।

कृषि क्षेत्रमा कम्तिमा दश वर्ष काम गरेको वा नीति निर्माणमा कम्तिमा ५ वर्षको अनुभव भएको व्यक्ति उपाध्यक्ष हुन सक्ने व्यवस्था छ । तर, उपाध्यक्ष हुनका लागि चाहिने अरु योग्यता, उपाध्यक्षको काम, कर्तव्य र अधिकार नै ऐनले प्रस्ट भनेको छैन । महतलाई भने ५ वर्ष संघीय सांसद बनेर नीति निर्माणको काम गरेका र पढाइ पनि व्यवस्थापनमा स्नातक गरेकाले नियुक्त गरिएको हो ।