कक्षा १२ को परीक्षामा ४ लाख ६७ हजार विद्यार्थी सहभागी

काठमाडौं

कक्षा १२ को परीक्षा आजदेखि सुरु भएको छ । राष्ट्रिय परीक्षा बोर्डका अनुसार ४ लाख ६७ हजार ३ सय ८९ विद्यार्थी परीक्षामा सहभागी भएका छन् । अहिले बिहान ८ बजेदेखि परीक्षा सुरु भएको हो ।। परीक्षाका लागि देशभर १ हजार ४ सय
५७ परीक्षा केन्द्र निर्धारण गरिएको छ । यस वर्ष ५६ हजारभन्दा धेरै विद्यार्थी ग्रेड वृद्धि परीक्षामा सहभागी भएका छन् । उनीहरूले जति विषयमा कम नम्बर आएको थियो त्यही विषयको मात्र ग्रेड वृद्धि परीक्षा दिनेछन् ।

सरकारले लेटर ग्रेडिङ निर्देशिका, २०७८ संशोधन गर्दै जति वटा विषयमा एनजी (नन ग्रेड) आएको छ, त्यो विषयमा मात्र परीक्षा दिनुपर्ने व्यवस्था गरेको छ । ती विद्यार्थीहरुले जति वटा विषयमा एनजी ल्याएका छन्, ती विषयमा मात्रै परीक्षा दिन पाउने भएका छन् । सरकारले कक्षा १२ सम्मलाई माध्यमिक तह घोषणा गरेका कारण यो परीक्षा माध्यमिक तहको अन्तिम परीक्षाको रुपमा लिइएको छ । वैशाख २६ गतेदेखि सुरू भएकाे परीक्षाा जेठ ४ गतेसम्म सञ्चालन हुनेछ ।