‘पोखरा फुटवेयर बिजनेस सेन्टर’ मा पोखरा महानगरले लगाइदिएको ताला खुल्यो

पोखरा

नेपालमै उत्पादित १० वटा ब्रान्डका जुत्ता एउटै छातामुनि बेच्ने गरी सञ्चालनमा आएको पोखरा फुटवेयर बिजनेस सेन्टर’ मा पोखरा महानगरले लगाएको ताला बिहीबार खुलेको छ ।

कानुनी प्रक्रिया नपुगेको भन्दै गत शुक्रबारमात्र उद्घाटन गरिएको बिजनेस सेन्टरमा ३ दिनअघि पोखरा महानगरले बिना सूचना सनकको भरमा ताला लगाएको थियो । बिना सूचना छापामार शैलीमा मेयर धनराज आचार्यको मौखिक निर्देशनमा महानगरले ताला लगाएको भन्दैै चौतर्फी आलोचना भएको थियो ।

घर धनीले सम्पत्ति कर नबुझाएकोे र सबै पसल दर्ता नभएको भन्दै महानगरले ताला लगाएको थियो । तर, १० वटै कम्पनी दर्ता गर्नका लागि फाइल बुझाए पनि एउटामात्र कम्पनी दर्ता गरिदिएको र पोखराका अन्य व्यवसायीको स्वार्थमा आएर बन्द गराइएको सञ्चालकहरुको आरोप थियो । महानगरले दर्ताका लागि दिएको निवेदन तामेलीमा राखेर व्यवसायीलाई हतोत्तसाही बनाउने काम गरेको सञ्चालकहरुको आरोप थियो ।

वडा नम्बर ८ का अध्यक्ष रुदद्रनाथ बरालले भने दर्ता प्रक्रियामै रहेको र महानगरले कुन आधारमा बन्द गराएको आफूलाई थाहा नभएको बताएका थिए ।

यसअघि दर्ता नभएकै कारण महानगरले बन्द गराएको चौतर्फी आलोचना भएपछि २ दिनभित्रै महानगरले दर्ता प्रक्रिया पूरा गरिदिएपछि बिहीदेखि सञ्चालनमा आएको हो ।
पोखरा महानगरपालिकाका मेयर धनराज आचार्यले भने कानुनी प्रक्रिया पूरा नभएकै कारण बन्द गराइएको बताएका छन् ।