पोखराबाट मानहुँकोट जाँदै गरेको माइक्रोबस दुर्घटना हुँदा एक जनाको ज्यान गयो

तनहुँ । पोखराबाट तनहुँको मानुङडाँडा (मानहुँकोट) जाँदै गरेको माइक्रो बस बुधबार विहान दुर्घटना हुँदा एक जनाको मृत्यु भएको छ भने ८ जना घाइते भएका छन् । पछिल्लो समय निकै चर्चामा आएको मानहुँडाँडामा आन्तरिक पर्यटकहरुको भिड लाग्ने गरेको छ ।

पोखराबाट जाँदै गरेको ग १ ख २९४२ नम्बरको हायस माइक्रो बस दुर्घटना हुँदा पोखरा महानगरपालिका गगनगौंडाकी २८ वर्षीया सुनिता गुरुङको मृत्यु भएको हो ।

उनको उपचारको क्रममा दमौलीको रत्नहरी अस्पतालमा मृत्यु भएको जिल्ला ट्राफिक प्रहरी कार्यालय तनहुँका प्रमुख रेशम रानाभाटले जानकारी दिए । घाइतेहरु सबैको दमौलीमा उपचार भैरहेको छ ।

हायस मानुङ पुग्नै लाग्दा ब्रेकरका कारण उक्लन नसकेपछि ब्याक भएर करिब तीन सय मिटर तल खसेको थियो ।