म्याग्दीको जलेश्वर बस दुर्घटनाः २७ जना घाइते

म्याग्दी
म्याग्दीको जलेश्वरमा बस दुर्घटना हुँदा २७ जना घाइते छन् । बेनीबाट अन्नपूणर् गाउँपालिका-६ घोडेपानीका लागि छुटेका जलेश्वर नजिकै ग १ ख ५६५५ नम्बरकोे बस दुर्घटना हुँदा २७ जना घाइते भएको जिल्ला प्रहरी कार्यालय म्याग्दीले जनाएको छ ।

घाइते मध्ये ५ जनालाई थप उपचारका लागि पोखरा रिफर गरिएको म्याग्दीका प्रहरी नायव उपरीक्षक भरत श्रेष्ठले जानकारी दिए । अन्य घाइतेको बेनी अस्पतालमा उपचार भइरहेको श्रेष्ठले बताए ।

बस भित्तामा ठोकिएर दुर्घटनामा परेको हो । सडकबाट डिलतर्फ मोडिन लागेको बसलाई चालकले कुनातर्फ मोड्न खोज्दा बस कुनातर्फको पहाडमा ठोक्किन पुगेको प्रहरी नायव उपरीक्षक श्रेष्ठले सुनाए । दुर्घटनामा घाइते भएका सबै खतरामुक्त उनले बताए ।