पोखरामा स्वरुप परिवर्तन गरेका २३ मोटरसाइकल प्रहरी नियन्त्रणमा

पोखरा ।

पोखरामा स्वरुप परिवर्तन गरी चलाएका २३ मोटरसाइकललाई प्रहरीले नियन्त्रणमा लिएको छ ।

अवस्था ठिक नरहेका र चर्को आवाज निकाली ध्वनी प्रदुषण गर्ने सवारी साधानलाई नियन्त्रणमा लिएको हो ।

मंसिर १ गतेदेखी ७ गतेसम्म जिल्ला प्रहरी कार्यालय कास्की र जिल्ला ट्राफिक प्रहरी कार्यालय कास्कीकोे संयुक्त टोलीले सवारी साधन चेकजाँच गर्दा स्वरुप परिवर्तन गरी चलाएका २३ वटा मोटरसाइकल नियन्त्रणमा लिएको जिल्ला प्रहरी कार्यालय कास्कीका सूचना अधिकारी डीएसपी बसन्तकुमार शर्माले जानकारी दिए ।

उनले नियन्त्रणमा लिएका सवारी साधनलाई आवश्यक कारवाहीका लागि यातायात व्यवस्था कार्यालय पोखरा पठाइएको बताए ।

साथै प्रहरीले स्वरुप परिवर्तन गरी ध्वनी प्रदुषण हुने गरी मोटरसाइकल नचलाउन सबैमा आग्रह गरेको छ ।

यदी चलाएको देखेमा जिल्ला प्रहरी कार्यालयको १०० र जिल्ला ट्राफिक कार्यालयको १०३ मा टेलिफोन नम्बरमा सूचना दिनको लागि अनुरोध छ ।