पाेखरा । कोपा अमेरिकामा ब्राजिलले लगातार दोस्रो जित हात पार्दा कोलम्बिया र भेनेजुएलाले गोलरहित बराबरी खेलेका छन् । शुक्रबार विहान सकिएको खेलमा आयोजक ब्राजिलले पेरुलाई ४-० गोलले पराजित गरेकाे हाे ।
ब्राजिलको जितमा एलेक्स सान्द्रो, नेइमार, एभर्टन रिबेइरो र रिचार्लिसनले एक-एक गोल गरे । खेलको १२ मिनेटमा ब्राजिलले अग्रता लिएको थियो । ब्राजिलका लागि एलेक्स सान्द्रोले पहिलो गोल गरे । खेलकाे ६८ मिनेटमा ब्राजिलका लागि नेइमारले डिबक्स बाहिरबाट सुन्दर गोल गरे । फ्रेडले उपलब्ध गराएको पासमा नेइमारले २० यार्ड टाढाबाट आकर्षक गोल गरेका हुन् ।
यस्तै, खेलको ८९ मिनेटमा ब्राजिलले तेस्रो गोल गर्याे । रिचार्लीसनको पासमा एभर्टन रिबेइरोले गोल गरे। याे उनकाे ब्राजिलका लागि पहिलो अन्तर्राष्ट्रिय गोल हाे ।
दोस्रो हाफको इन्जुरी टाइमको तेस्रो मिनेटमा रिचार्लीसनले ब्राजिलका लागि चौथो गोल गरे । फिर्मिनोको प्रहारलाई पेरुका गोलकिपरले फर्काएकाे रिबाउन्डमा रिचार्लीसनले गोल गरेका हुन् ।
समूह ‘बी’ मा लगातार दोस्रो खेलमा जित हात पारेसँगै ब्राजिलले ६ अंक जोडेको छ। दोस्रो स्थानको कोलम्बियाको ४ अंक छ । शुक्रबार विहान भएको अर्को खेलमा कोलम्बिया र भेनेजुएलाले गोलरहित बराबरी खेले ।
यसअघि ब्राजिलले पहिलो खेलमा भेनेजुएलालाई ३-० गोलले हराएको थियो । अब ब्राजिलले समूहको तेस्रो खेलमा कोलम्बियासँग प्रतिस्पर्धा गर्नेछ ।
प्रकाशित मिति २०७८ असार ४ गते शुक्रबार १०:५०
