बुङकोट वडा नम्बर सात लगातार दोस्रो पटक उत्कृष्ट, पाँच लाखको पुरस्कार

गोरखा ।

गोरखाको शहीद लखन गाउँपालिका वडा नम्बर–७, बुङकोट लगातार दोस्रो पटक उत्कृष्ट वडा घोषित भएको छ । गाउँपालिकाको “उत्कृष्ट वडा छनोट कार्यविधि २०८१” अनुसार १०० पूर्णाङ्कको मूल्याङ्कन प्रणालीमा उच्च अंक प्राप्त गर्दै वडाले यो सफलता हासिल गरेको हो । २०८२ साल बैशाख २२ गतेको गाउँ कार्यपालिकाको बैठकले वडा ७ लाई उत्कृष्ट घोषणा गर्दै भौतिक पूर्वाधार विकासका लागि पाँच लाख रुपैयाँ पुरस्कारस्वरूप बजेट प्रदान गर्ने निर्णय गरेको हो ।

वडाध्यक्ष शरण श्रेष्ठले यो उपलब्धिमा वडा जनप्रतिनिधि, कर्मचारी, स्वास्थ्य चौकी, विद्यालय, उपभोक्ता समिति, महिला समूह, राजनीतिक दल, संघसंस्था, सञ्चारकर्मी र सबै वडावासीको सहयोग महत्त्वपूर्ण रहेको भन्दै धन्यवाद व्यक्त गरेका छन् । साथै, आगामी दिनमा पनि सकारात्मक सोचका साथ सहकार्य जारी रहने प्रतिबद्धता जनाएका छन् ।