पोखरा ६, जेठ ।
नेकपा माओवादी केन्द्रका उपमहासचिव वर्षमान पुनले वर्तमान सरकार ढल्ने अवस्थामा पुगिसकेको बताएका छन् ।
मंगलबार पोखरामा पत्रकारहरूसँग कुरा गर्दै उनले वर्तमान केपी ओली नेतृत्वको सरकार ढलेमा नयाँ सरकारको नेतृत्व कांग्रेसले गर्नुपर्ने बताए ।
उपमहासचिव वर्षमान पुनले भने, सरकार ढल्यो भने पहिलोले दाबी गर भनेका छौँ ।
तेस्रो पार्टीले १८ महिना सरकार चलाएर रेकर्ड बनाएका छौँ ।
अब पहिलोलाई बहुमत एमाले र माओवादी विना पनि पुग्छ ।
पहिलोले नेतृत्व दाबी गर भन्ने हाम्रो भनाइ हो । बहुमत नै पुगेन भने हामी सोच्छौँ ।
पहिलो पार्टीले सरकार नचलाए फ्रेस म्यान्डेटका लागि जनतामा जानु उपयुक्त हुने उनको सुझाव छ ।
कांग्रेस र एमालेले एक अर्कालाई तर्साउन माओवादीसँग संवाद भएको हल्ला गरिएको भन्दै उनले त्यस्तो हल्लामा कुनै सत्यता नरहेको बताए ।
उनले वर्तमान सरकार माओवादीका कारण नभई आफ्नै कारण ढल्ने पनि दाबी गरे ।
गभर्नर नियुक्ति प्रकरणले सरकार ढल्ने अवस्था बनेको पनि पुनको भनाइ थियो ।
उनले अहिले चर्चा गरिएका व्यक्तिहरू गभर्नर नियुक्त नहुने पनि तर्क गरे ।
अहिले रिक्त भएको २ महिनासम्म नियुक्ति हुन सकेको छैन अहिले चर्चा गरिएका मान्छे पनि नियुक्त हुँदै छैनन् ।
सरकार बिचौलियाले नै सञ्चालन गरिरहेको पुनले दाबी गरे ।
प्रकाशित मिति २०८२ जेठ ७ गते मंगलबार ०४:३०
