काठमाडौं ।
राष्ट्रिय स्वतन्त्र पार्टीका उपसभापति डा. स्वर्णिम वाग्लेले आफ्नो पार्टी भिजिट भिसा प्रकरणका सम्बन्धमा सरकारसँग उधारो सम्झौता गर्ने पक्षमा नरहेको स्पष्ट पारेका छन् ।
शुक्रबार संसद भवन परिसरमा सञ्चारकर्मीहरुसँग कुराकानी गर्दै उपसभापति वाग्लेले यस्तो बताएका हुन् ।
उनले सरकार र माओवादी केन्द्रबीच भएको सहमतिमा अनुसन्धानको समयसीमा र कार्यादेश (टिओआर) समेत नभएको कारण आफूहरु सहभागि नभएको बताए ।
सरकारको नियत ठिक नभएकै कारण रास्वपाको पाँच बुँदे प्रश्तावमाथि छलफल नगरेको आरोप समेत उनले लगाए ।
भिजिट भिसा प्रकरणको समस्या समाधान गर्नको लागि संसदीय छानविन आयोेग वा न्यायिक आयोग गठन हुनुपर्ने आफूहरुको अडान कायमै रहेको उल्लेख गर्दै उनले संघर्ष नछाड्ने जिकिर जिकिर गरे ।
उनले भने, ‘सरकार र माओवादी केन्द्रबीच भएको सहमतिमा छानविन गर्ने समयसीमा पनि छैन । कार्यादेश के हो ? कहिले सम्पन्न गर्ने हो ? यस्तो उदारो सम्झौतामा राष्ट्रिय स्वतन्त्र पार्टी सहमतिमा आउँदैन । हाम्रो पार्टी राजनीतिमा नयाँ छ तर बेकुफ छैन । त्यही भएर यस्तो उधारो र कमिटमेन्ट नभएको सम्झौतामा हामी सहभागि हुनसक्ने कुनै गुञ्जायस थिएन । सरकारको नियत ठिक भएको भए हाम्रो पाँच बुँदे प्रश्तावबाट संवाद गर्न सकिन्थ्यो । समयसीमामा अलिकति समन्वय गर्न सकिन्थ्यो । त्यसकारण संसदीय छानविन आयोग वा उच्चस्तरीय छानविन आयोगमै हाम्रो अडान थियो । गृहमन्त्रीको राजीनामा पछि आउने गरेर हामी सदासयता देखाउने मनस्थितिमा पनि थियौँ । त्यसकारण आज हामी आजको सम्झौतामा हामी सहमतिमा गएनौँ ।’
सरकार भिजिट भिसाको नाममा हुने गरेको मानव तस्करीको समस्या समाधान गर्न गम्भिर नदेखिएका कारण आफूहरुले आन्दोलन कायमै राखेको उपसभापति वाग्लेको भनाइ छ ।
प्रकाशित मिति २०८२ जेठ ३२ गते शनिबार ०९:२२
