अब प्राप्त उजुरीको अध्ययनपछि सुनुवाइ प्रक्रिया अघि बढाइने
काठमाडौं ।
संसदीय सुनुवाइ विशेष समितिले सर्वोच्च अदालतका प्रस्तावित तीन न्यायाधीशविरुद्ध उजुरी आह्वान गरेको छ ।
सिंहदरबारमा हिजो बसेको समितिको बैठकले वरिष्ठ अधिवक्ता मेघराज पोखरेल, उच्च अदालत जनकपुरका मुख्य न्यायाधीश श्रीकान्त पौडल र उच्च अदालत दिपायलकी प्रमुख न्यायाधीश शान्तिसिंह थापाविरुद्ध १० दिनभित्र उजुरी दिन सार्वजनिक आग्रह गरेको हो ।
तीनै जनालाई गत जेठ २७ गतेको न्याय परिषद्को बैठकले सर्वोच्चको न्यायाधीशमा सिफारिस गरेको थियो ।
यसैबीच बैठकमा सांसदहरुले न्यायाधीश सिफारिस समावेशी हुन नसकेको भन्दै आपत्ति जनाएका छन् ।
समितिको बैठकमा बोल्दै जनता समाजवादी पार्टीका सांसद प्रकाश अधिकारी र नेपाली कांग्रेस सांसद जीवन परियारले न्याय परिषद् सदस्य र न्यायाधीश गरी चार जना सिफारिस गरिए पनि समावेशी हुन नसकेको भन्दै न्यायपरिषद्लाई बोलाएर जवाफ माग्नुपर्ने बताए ।
त्यस्तै न्याय परिषद् सदस्यमा सिफारिस भएका वरिष्ठ अधिवक्ता महेश नेपालको नियुक्तिबारे पनि सुनुवाई प्रक्रिया प्रारम्भ भएको समितिले जनाएको छ ।
अब प्राप्त उजुरीहरूको अध्ययनपछि सुनुवाइ प्रक्रिया अघि बढाइने जनाइएको छ ।
प्रकाशित मिति २०८२ असार १ गते आइतबार ०९:०७
