मङ्गोलियामा परम्परागत नादम महोत्सव उद्घाटन

एजेन्सी ।

मङ्गोलियाली राष्ट्रपति उखना खुरेलसुखले शुक्रवार देशको राष्ट्रिय दिवस मनाउने परम्परागत नादम महोत्सवको उद्घाटन गरेका छन् ।

राजधानी उलान बाटोरको एक रंगशालामा उद्घाटन समारोहमा बोल्दै खुरेलसुखले नादमलाई मङ्गोलियाको राज्यत्व, इतिहास र संस्कृतिको अमूल्य प्रतीकको रूपमा वर्णन गरे । उनले यसलाई राष्ट्रको एकता, स्वतन्त्रता र समृद्धिको प्रतिबिम्ब, साथै मङ्गोलियाली जनताको लागि आध्यात्मिक शक्ति र आनन्दमय उत्सवको रूपमा वर्णन गरे । युनेस्कोले अमूर्त सांस्कृतिक सम्पदाको रूपमा सूचीवद्ध गरेको नादम महोत्सव घुमन्ते देशमा हरेक वर्ष जुलाई ११ देखि १५ सम्म मनाइने आधिकारिक बिदा हो । नादम शब्दको अर्थ मङ्गोलियाली भाषामा खेल वा रमाइलो हो ।

यो महोत्सव राष्ट्रका तीन परम्परागत पुरुष खेलहरूमा केन्द्रित छ । घोडा दौड, धनुर्विद्या र कुस्तीमा यो सम्बन्धित छ ।