पोखरा ।
आजदेखि साउन महिनाभर राष्ट्रिय डेंगी सचेतना अभियान शुरू भएको छ ।
लामखुट्टेको नियन्त्रण र टोकाइबाट बच्ने उपायबारे सचेतना बढाउने लक्ष्यसहित सरकारले साउन महिनाभर अभियान सञ्चालन गर्ने घोषणा गरेको थियो ।
सोही घोषणाअनुरुप सरकारले आजदेखि एक महिने राष्ट्रिय डेंगी सचेतना अभियान शुरू गरेको छ ।
स्वास्थ्य सेवा विभागको इपिडिमोलोजी तथा रोग नियन्त्रण महाशाखाका अनुसार तीनै तहका सरकार सबै मन्त्रालय, सांसदको सहभागिता यो अभियान सञ्चालन हुनेछ ।
जसमा ‘हरेक शुक्रवार सफा शुक्रवार’ मार्फत सबै सार्वजनिक निकाय र संस्थाहरूमा सरसफाइ तथा लामखुट्टे प्रजनन स्थलहरू खोजी गरी सफा गर्ने कार्यक्रम रहेको छ ।
दोस्रो कार्यक्रम अन्तर्गत ‘हप्ताको एक दिन एक घण्टा हुँदैन कुनै कष्ट’ भन्ने सन्देशसहित समुदायको सहभागितामा लामखुट्टेको लार्भा खोज र नष्ट अभियान सञ्चालन हुनेछ ।
यसैगरी हरेक वडामा घरदैलो कार्यक्रम अभियानमा पोष्टर र सञ्चारमाध्यमद्वारा डेंगीको जोखिम लक्षण र रोकथामबारे जनचेतना अभियान सञ्चालन गर्ने कार्यक्रम रहेको छ ।
यस वर्ष हुम्ला, डोल्पा, मनाङ र रसुवाबाहेक ७३ जिल्लामा सङ्क्रमण पुष्टि भइसकेको छ । डेंगी लाग्न नदिन लामखुट्टेको टोकाइबाट बच्न डाक्टरहरुले आग्रह गर्दै आएका छन् ।
सरकारले सन् २०३० सम्ममा डेंगी संक्रमण शून्यमा झार्ने लक्ष्य लिएको छ ।
तर यसअघि कम संक्रमण देखिने काठमाण्डौ उपत्यकासहित पहाडी र उच्च पहाडी क्षेत्रमा समेत डेंगी फैलिरहेकोले नियन्त्रण चुनौतीपूर्ण बन्दै गएको छ ।
प्रकाशित मिति २०८२ साउन २ गते बिहीबार १०:०६
