बाढीले कार बगायाे, ४ जनाकाे मृत्यु

दाङ । दाङको सिस्ने खोलामा आएको बाढीले कार बगाउँदा चारै जनाको मृत्यु भएको छ । यसअघि दुई जनाको शव भेटिएको थियो भने दुई जना हराइरहेका थिए ।

बाढीमा बेपत्ता भएका अर्का दुई जनाको पनि केहीबेर अघि शव भेटिएसँगै मृतक सङ्ख्या चार पुगेको हो ।

मृत्यु हुनेमा घोराही–१३ की ४० वर्षीया रितामाया पुन, सोही ठाउँकै ३२ वर्षीय शुशीला श्रेष्ठ, घोराही–१४ की ३० वर्षीया राधा श्रेष्ठ कुवँर र सोही ठाउँकै ४२ वर्षीया बिमला केसी रहेका छन् ।

प्रहरीका अनुसार रुपैडियाबाट किनमेल गरेर फर्कँदै गरेको प्रदेश ०३– ०१ –०२४ च ४४४० नम्बरको कारलाई बाढीले बगाएको हो ।

कारका चालक घोराही–१५ का ४० वर्षीय नरबहादुर पुनलाई भने उद्धार गरिएको प्रहरीले जनाएको छ । चालकलाई खुट्टा भाचिएको अवस्थामा उद्धार गरिएको प्रहरीले जनाएको छ । अहिले पुनको घोराहीमा रहेको राप्ती स्वास्थ्य विज्ञान प्रतिष्ठानमा उपचार भइरहेको छ ।