काठमाडाैं ।
सञ्चार तथा सूचना प्रविधि मन्त्रालयमा सूचीकृत नभएका सामाजिक सञ्जाल प्लाटफर्म क्रमैसँग बन्द गरिन थालेका छन् । इन्टरनेट सेवा प्रदायकहरूले बिहीबार रातिदेखि त्यस्ता प्लाटफर्मका वेब ठेगाना (यूआरएल) ब्लक गर्न थालेका हुन् ।
सामाजिक सञ्जाल बन्द गर्ने निर्णय गरेको २ दिनपछि नेपालमा युट्युब पनि बन्द भएको छ । इन्टरनेट सेवा प्रदायक संघ (आईएपान)ले नेपाल दूरसञ्चार प्राधिकरणको निर्देशन मान्दै नेपालमा युट्युब बन्द गरेको हो।
युट्युब बन्द भएसँगै भिडियो देखिन छाडेका छन् । आईएसपानका अध्यक्ष सुधीर पराजुलीका अनुसार युट्युबका सबै आइपी एड्रेसहरू खोज्दै बन्द गर्ने प्रक्रिया सुरू भइसकेको छ ।
उनका अनुसार अहिले वेब ब्राउजरमा युट्युबका आईपी एड्रेसहरू बन्द गरिएका छन् भने मोबाइलमा चलिरहेको छ । हिजो फेसबुक, एक्स, इन्स्टाग्राम वेब पेजमाबन्द भएका छन् भने आज बिहानदेखि वेब ब्राउजरमा युट्युब पनि बन्द छ भने मोबाइलमा बन्द हुने क्रममा छन्।
सूचीकृत नभएका सामाजिक सञ्जाल प्लाटफर्म बन्द गर्ने सरकारी निर्णयपछि एक्स (ट्वीटर) ले नेपालमा दर्ता हुन चाहेको भन्दै इमेल पठाएको छ ।
एक्सले शुक्रबार नै मन्त्रालयलाई आधिकारिक इमेल लेखेर सूचीकरण प्रकियाबारे सोधेको हो । ‘एक्सले जिज्ञासा राखे पनि नेपालमा दर्ताका लागि कुनै आधिकारिक निवेदन भने दिएको छैन,’ सञ्चार मन्त्रालयका प्रवक्ता गजेन्द्रकुमार ठाकुरले भने ।
मेटाले भने सामाजिक सञ्जाल दर्ता प्रक्रियालगायत विषयमा बिहीबार नै मन्त्रालयका अधिकारीसँग अनौपचारिक जिज्ञासा राखेको तर आधिकारिक निवेदन नआएको एक अधिकारीले बताए ।
सरकारले मंसिर २०८० मा सामाजिक सञ्जाल निर्देशिका जारी गरेयता प्लाटफर्मलाई सूचीकृत हुन अनुरोध गर्दै पाँच पटक सूचना निकालेको थियो । पछिल्लो पटक तोकिएको ७ दिनको समयसीमा बुधबार सकिएपछि भने सरकार सूचीकृत नभएका प्लाटफर्म बन्द गर्न अग्रसर भएको हो ।
सरकारले सामाजिक सञ्जालमा रोक लगाउने निर्णय कार्यान्वयन प्रक्रिया अगाडि बढाएपछि त्यसविरुद्ध केही कानुन व्यवसायी र अधिकारकर्मी शुक्रबार नै रिट लिएर सर्वोच्च अदालत पुगेका छन् । सर्वोच्चका सूचना अधिकारी नीराजन पाण्डेले ती रिट दर्तालगायत प्रक्रियाबारे आइतबार निर्णय हुने बताए ।
प्रकाशित मिति २०८२ भदौ २१ गते शनिबार ०२:४९
