पोखरामा जेन–जीको प्रदर्शनः ९ जना घाइते, २९ जना पक्राउ

पोखरा
पोखरामा जेन–जी को प्रदर्शनबाट ९ जना घाइते भएका छन् । कास्कीकी प्रमुख जिल्ला अधिकारी रुद्रादेवी शर्माका अनुसार प्रदर्शनका क्रममा ४ जना सुरक्षाकर्मी र ५ जना प्रदर्शनकारी घाइते भएका छन् । उनीहरुको गण्डकी हस्पिटल, पोखरा स्वास्थ्य विज्ञान प्रतिष्ठानसहितका अस्पतालमा उपचार भइरहेको छ ।

प्रदर्शनका क्रममा २९ जनालाई पक्राउ गरिएको कास्कीकी प्रजिअ शर्माले बताइन् । प्रदर्शनकारीले गण्डकी प्रदेशको वन तथा वातावरण मन्त्रालयको गाडीमा समेत आगजनी गरेका हुन् । प्रदर्शनकारीले गण्डकी प्रदेशको मुख्यमन्त्री कार्यालयमा आगजनी गर्न खोजेपछि प्रहरीले अश्रुग्यास तथा पानीको फोहरा प्रहार गरेको थियो । त्यसपछि प्रदर्शन झनै चर्किएको थियो । जसका कारण प्रहरीले गोलीसमेत चलाएको थियो ।

प्रदर्शन चर्किँदै गएपछि पोखरामा पनि स्थानीय प्रशासनले निशेधाज्ञा जारी गरेको छ । शहिदचोकको पूर्वतर्फ वाइचोक, पश्चिमतर्फ फिस्टेलचोक, उत्तरतर्फ मालपोत कार्यालय र दक्षिणतर्फ राष्ट्र बैङ्क चोकसम्म निषेधाज्ञा जारी दिएको हो ।