रूसको प्रशान्त महासागरको दुई आणविक शक्ति सम्पन्न पनडुब्बीहरूले ओखोत्स्कको समुन्द्रमा नौसेना अभ्यासको क्रममा क्रूज क्षेप्यास्त्रहरू सफलतापूर्वक प्रक्षेपण गरेको फ्लीटले शुक्रवार जनाएको छ ।
बहुउद्देश्यीय पनडुब्बीहरू क्रास्नोयास्र्क र ओम्स्कले २५० किलोमिटरभन्दा बढी टाढा रहेको तोकिएको समुन्द्री लक्ष्यमा ओनिक्स र ग्रानिट क्रूज क्षेप्यास्त्रहरू प्रहार गरेको फ्लीटको प्रेस सेवाले एक विज्ञप्तिमा जनाएको छ ।
अनुगमन तथ्याङ्कले देखाएको छ कि तीनवटै क्षेप्यास्त्रहरू सिधै लक्ष्यमा प्रहार गरेका थिए । प्रक्षेपणको समयमा परीक्षण क्षेत्र सुरक्षित गर्न प्रशान्त महासागरको सतह जहाजहरू र नौसेना उड्डयन एकाइहरू तैनाथ गरिएका थिए ।
मिसाइल प्रक्षेपण सेप्टेम्बर १२ देखि रूसको उत्तरपूर्वी क्षेत्रमा संयुक्त कमाण्ड अफ फोर्सेसद्वारा आयोजित कमाण्ड–एन्ड–स्टाफ अभ्यासको एक हिस्सा थियो ।
अभ्यासहरू उत्तरी प्रशान्त महासागरमा समुन्द्री लेनहरूको सुरक्षाका साथै कामचटका र चुकोटका क्षेत्रहरू र नजिकैका टापु क्षेत्रहरूको तटरेखाको रक्षामा केन्द्रित थिए ।
यो अभ्यास रूसी नौसेनाको प्रशिक्षण योजना अन्तर्गत सञ्चालन गरिएको र गर्मी अवधिको लागि लडाई प्रशिक्षणको अन्तिम चरणको रूपमा काम गरेको फ्लीटले बताएको छ ।
प्रकाशित मिति २०८२ असोज ४ गते शनिबार १२:०५
